KUCHING: Pansik akademik ba tikas Ijazah Doktor Falsafah (PhD) patut dilanggur serap enggau meri empas dikena nyukung pengawa ngaga polisi pelajar ti nipak peminta kemaya hari.
Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, orang ti deka bulih PhD nya raban pemikir beguna ti ulih mantu negap sistem pelajar menua.
Iya meransang sida berati ke pansik PhD nyadi siti pengawa strategik ba pemansang pelajar, kelebih agi nempa penemu baru ti nipak ke pemar kemaya hari.
“Aku minta kita ti deka bulih PhD ngaga pansik tesis bekaul pelajar ngambi enda kelalu dibalut pekara pedagogi, chara ngajar enggau polisi aja, tang mega meri perati ngagai nilai mensia ti majak lenyau ketegal diparit teknologi enggau ke bukai,” ku iya.
Iya nyebut pekara nya ba mua mayuh rambau Pengerami Nutup enggau Pengerami Makai Lemai Program Khas PhD Model Bakih Strategik Universiti Pendidikan Sultan Idris (UPSI)- Terbilang Academy (Orientasi, Kolokium & Woksyop Nulis Jurnal) di Institut Aminuddin Baki, ditu, Hari Enam.
Ngenang silik, Datuk Abdullah madah, pelajar bisi kualiti ukai semina nempa orang ti bepelajar tinggi aja, tang orang ti bisi runding ti regas, basa enggau ulah menuku nyadi perayat ti bisi tanggungpengawa, seriris enggau pengelain pupu bansa, pengarap enggau budaya di Malaysia.
Berebak enggau nya, iya meransang pansik pelajar mega nisih empas teknologi digital, media sosial enggau artificial intelligence (AI) ba dunya pelajar.
Kaban Kunsil Nengeri (ADUN) Semop nya mega madah ke pemesai guna pemansang model pelajar ti engkeman engau konteks lokal, nyengkaum realiti pelajar ba kandang menua pesisir, nentika pengawa ngedutka takah pemansang entara mengeri enggau menua pesisir ulih dipejalai enggau meruan.
Ku iya, asil pansik PhD ti serap enggau bisi kualiti ulih nyadi malin beguna ngagai perintah ba mayuh pekara nyengkaum ngaga polisi dikena ngelati polisi pelajar.
Sama datai, Chairman Eksekutif Terbilang Academy Sarawak ti mega Koordinator Program Khas Bakih Strategik Pasca Siswazah Terbilang Academy Sarawak UPSI, Dr. Ishak Johari enggau Tuai Unit Fakulti Sains Komputer & META-Teknologi UPSI Dr. Hishamudin Abdul Rahman.-EDISI UKAS
Pemberita: Nur Nabilla
Gambar: George S. Embie